https://sensusplenior.net/wiki/index.php?action=history&feed=atom&title=Leningrad%3AAm 2026-08-31T16:17:21Z Revision history for this page on the wiki MediaWiki 1.28.3 https://sensusplenior.net/wiki/index.php?title=Leningrad:Am&diff=33976&oldid=prev 2022-04-25T09:41:43Z

<p>Created page with &quot;‪xxxx Unicode/XML Leningrad Codex [UXLC 1.4]‬ ‪xxxx Build: 26.5 - 1 April 2022 00:00‬ ‪xxxx Layout: Qere-only; Content: Consonants.‬ ‪xxxx‬ ‪x...&quot;</p> <p><b>New page</b></p><div>‪xxxx Unicode/XML Leningrad Codex [UXLC 1.4]‬<br /> ‪xxxx Build: 26.5 - 1 April 2022 00:00‬<br /> ‪xxxx Layout: Qere-only; Content: Consonants.‬<br /> ‪xxxx‬<br /> ‪xxxx Amos (9 chapters, 146 verses).‬<br /> ‪xxxx‬<br /> ‪xxxx Chapter 1 (15 verses)‬<br /> ‪xxxx‬<br /> ‫ דברי עמוס אשר היה בנקדים מתקוע אשר חזה על ישראל בימי עזיה מלך יהודה ובימי ירבעם בן יואש מלך ישראל שנתים לפני הרעש ‬<br /> ‫ ויאמר יהוה מציון ישאג ומירושל͏ם יתן קולו ואבלו נאות הרעים ויבש ראש הכרמל ‬<br /> ‫ כה אמר יהוה על שלשה פשעי דמשק ועל ארבעה לא אשיבנו על דושם בחרצות הברזל את הגלעד ‬<br /> ‫ ושלחתי אש בבית חזאל ואכלה ארמנות בן הדד ‬<br /> ‫ ושברתי בריח דמשק והכרתי יושב מבקעת און ותומך שבט מבית עדן וגלו עם ארם קירה אמר יהוה ‬<br /> ‫ כה אמר יהוה על שלשה פשעי עזה ועל ארבעה לא אשיבנו על הגלותם גלות שלמה להסגיר לאדום ‬<br /> ‫ ושלחתי אש בחומת עזה ואכלה ארמנתיה ‬<br /> ‫ והכרתי יושב מאשדוד ותומך שבט מאשקלון והשיבותי ידי על עקרון ואבדו שארית פלשתים אמר אדני יהוה ‬<br /> ‫ כה אמר יהוה על שלשה פשעי צר ועל ארבעה לא אשיבנו על הסגירם גלות שלמה לאדום ולא זכרו ברית אחים ‬<br /> ‫ ושלחתי אש בחומת צר ואכלה ארמנתיה ‬<br /> ‫ כה אמר יהוה על שלשה פשעי אדום ועל ארבעה לא אשיבנו על רדפו בחרב אחיו ושחת רחמיו ויטרף לעד אפו ועברתו שמרה נצח ‬<br /> ‫ ושלחתי אש בתימן ואכלה ארמנות בצרה ‬<br /> ‫ כה אמר יהוה על שלשה פשעי בני עמון ועל ארבעה לא אשיבנו על בקעם הרות הגלעד למען הרחיב את גבולם ‬<br /> ‫ והצתי אש בחומת רבה ואכלה ארמנותיה בתרועה ביום מלחמה בסער ביום סופה ‬<br /> ‫ והלך מלכם בגולה הוא ושריו יחדו אמר יהוה ‬<br /> ‪xxxx‬<br /> ‪xxxx Chapter 2 (16 verses)‬<br /> ‪xxxx‬<br /> ‫ כה אמר יהוה על שלשה פשעי מואב ועל ארבעה לא אשיבנו על שרפו עצמות מלך אדום לשיד ‬<br /> ‫ ושלחתי אש במואב ואכלה ארמנות הקריות ומת בשאון מואב בתרועה בקול שופר ‬<br /> ‫ והכרתי שופט מקרבה וכל שריה אהרוג עמו אמר יהוה ‬<br /> ‫ כה אמר יהוה על שלשה פשעי יהודה ועל ארבעה לא אשיבנו על מאסם את תורת יהוה וחקיו לא שמרו ויתעום כזביהם אשר הלכו אבותם אחריהם ‬<br /> ‫ ושלחתי אש ביהודה ואכלה ארמנות ירושל͏ם ‬<br /> ‫ כה אמר יהוה על שלשה פשעי ישראל ועל ארבעה לא אשיבנו על מכרם בכסף צדיק ואביון בעבור נעלים ‬<br /> ‫ השאפים על עפר ארץ בראש דלים ודרך ענוים יטו ואיש ואביו ילכו אל הנערה למען חלל את שם קדשי ‬<br /> ‫ ועל בגדים חבלים יטו אצל כל מזבח ויין ענושים ישתו בית אלהיהם ‬<br /> ‫ ואנכי השמדתי את האמרי מפניהם אשר כגבה ארזים גבהו וחסן הוא כאלונים ואשמיד פריו ממעל ושרשיו מתחת ‬<br /> ‫ ואנכי העליתי אתכם מארץ מצרים ואולך אתכם במדבר ארבעים שנה לרשת את ארץ האמרי ‬<br /> ‫ ואקים מבניכם לנביאים ומבחוריכם לנזרים האף אין זאת בני ישראל נאם יהוה ‬<br /> ‫ ותשקו את הנזרים יין ועל הנביאים צויתם לאמר לא תנבאו ‬<br /> ‫ הנה אנכי מעיק תחתיכם כאשר תעיק העגלה המלאה לה עמיר ‬<br /> ‫ ואבד מנוס מקל וחזק לא יאמץ כחו וגבור לא ימלט נפשו ‬<br /> ‫ ותפש הקשת לא יעמד וקל ברגליו לא ימלט ורכב הסוס לא ימלט נפשו ‬<br /> ‫ ואמיץ לבו בגבורים ערום ינוס ביום ההוא נאם יהוה ‬<br /> ‪xxxx‬<br /> ‪xxxx Chapter 3 (15 verses)‬<br /> ‪xxxx‬<br /> ‫ שמעו את הדבר הזה אשר דבר יהוה עליכם בני ישראל על כל המשפחה אשר העליתי מארץ מצרים לאמר ‬<br /> ‫ רק אתכם ידעתי מכל משפחות האדמה על כן אפקד עליכם את כל עונתיכם ‬<br /> ‫ הילכו שנים יחדו בלתי אם נועדו ‬<br /> ‫ הישאג אריה ביער וטרף אין לו היתן כפיר קולו ממענתו בלתי אם לכד ‬<br /> ‫ התפל צפור על פח הארץ ומוקש אין לה היעלה פח מן האדמה ולכוד לא ילכוד ‬<br /> ‫ אם יתקע שופר בעיר ועם לא יחרדו אם תהיה רעה בעיר ויהוה לא עשה ‬<br /> ‫ כי לא יעשה אדני יהוה דבר כי אם גלה סודו אל עבדיו הנביאים ‬<br /> ‫ אריה שאג מי לא יירא אדני יהוה דבר מי לא ינבא ‬<br /> ‫ השמיעו על ארמנות באשדוד ועל ארמנות בארץ מצרים ואמרו האספו על הרי שמרון וראו מהומת רבות בתוכה ועשוקים בקרבה ‬<br /> ‫ ולא ידעו עשות נכחה נאם יהוה האוצרים חמס ושד בארמנותיהם ‬<br /> ‫ לכן כה אמר אדני יהוה צר וסביב הארץ והורד ממך עזך ונבזו ארמנותיך ‬<br /> ‫ כה אמר יהוה כאשר יציל הרעה מפי הארי שתי כרעים או בדל אזן כן ינצלו בני ישראל הישבים בשמרון בפאת מטה ובדמשק ערש ‬<br /> ‫ שמעו והעידו בבית יעקב נאם אדני יהוה אלהי הצבאות ‬<br /> ‫ כי ביום פקדי פשעי ישראל עליו ופקדתי על מזבחות בית אל ונגדעו קרנות המזבח ונפלו לארץ ‬<br /> ‫ והכיתי בית החרף על בית הקיץ ואבדו בתי השן וספו בתים רבים נאם יהוה ‬<br /> ‪xxxx‬<br /> ‪xxxx Chapter 4 (13 verses)‬<br /> ‪xxxx‬<br /> ‫ שמעו הדבר הזה פרות הבשן אשר בהר שמרון העשקות דלים הרצצות אביונים האמרת לאדניהם הביאה ונשתה ‬<br /> ‫ נשבע אדני יהוה בקדשו כי הנה ימים באים עליכם ונשא אתכם בצנות ואחריתכן בסירות דוגה ‬<br /> ‫ ופרצים תצאנה אשה נגדה והשלכתנה ההרמונה נאם יהוה ‬<br /> ‫ באו בית אל ופשעו הגלגל הרבו לפשע והביאו לבקר זבחיכם לשלשת ימים מעשרתיכם ‬<br /> ‫ וקטר מחמץ תודה וקראו נדבות השמיעו כי כן אהבתם בני ישראל נאם אדני יהוה ‬<br /> ‫ וגם אני נתתי לכם נקיון שנים בכל עריכם וחסר לחם בכל מקומתיכם ולא שבתם עדי נאם יהוה ‬<br /> ‫ וגם אנכי מנעתי מכם את הגשם בעוד שלשה חדשים לקציר והמטרתי על עיר אחת ועל עיר אחת לא אמטיר חלקה אחת תמטר וחלקה אשר לא תמטיר עליה תיבש ‬<br /> ‫ ונעו שתים שלש ערים אל עיר אחת לשתות מים ולא ישבעו ולא שבתם עדי נאם יהוה ‬<br /> ‫ הכיתי אתכם בשדפון ובירקון הרבות גנותיכם וכרמיכם ותאניכם וזיתיכם יאכל הגזם ולא שבתם עדי נאם יהוה ‬<br /> ‫ שלחתי בכם דבר בדרך מצרים הרגתי בחרב בחוריכם עם שבי סוסיכם ואעלה באש מחניכם ובאפכם ולא שבתם עדי נאם יהוה ‬<br /> ‫ הפכתי בכם כמהפכת אלהים את סדם ואת עמרה ותהיו כאוד מצל משרפה ולא שבתם עדי נאם יהוה ‬<br /> ‫ לכן כה אעשה לך ישראל עקב כי זאת אעשה לך הכון לקראת אלהיך ישראל ‬<br /> ‫ כי הנה יוצר הרים וברא רוח ומגיד לאדם מה שחו עשה שחר עיפה ודרך על במתי ארץ יהוה אלהי צבאות שמו ‬<br /> ‪xxxx‬<br /> ‪xxxx Chapter 5 (27 verses)‬<br /> ‪xxxx‬<br /> ‫ שמעו את הדבר הזה אשר אנכי נשא עליכם קינה בית ישראל ‬<br /> ‫ נפלה לא תוסיף קום בתולת ישראל נטשה על אדמתה אין מקימה ‬<br /> ‫ כי כה אמר אדני יהוה העיר היצאת אלף תשאיר מאה והיוצאת מאה תשאיר עשרה לבית ישראל ‬<br /> ‫ כי כה אמר יהוה לבית ישראל דרשוני וחיו ‬<br /> ‫ ואל תדרשו בית אל והגלגל לא תבאו ובאר שבע לא תעברו כי הגלגל גלה יגלה ובית אל יהיה לאון ‬<br /> ‫ דרשו את יהוה וחיו פן יצלח כאש בית יוסף ואכלה ואין מכבה לבית אל ‬<br /> ‫ ההפכים ללענה משפט וצדקה לארץ הניחו ‬<br /> ‫ עשה כימה וכסיל והפך לבקר צלמות ויום לילה החשיך הקורא למי הים וישפכם על פני הארץ יהוה שמו ‬<br /> ‫ המבליג שד על עז ושד על מבצר יבוא ‬<br /> ‫ שנאו בשער מוכיח ודבר תמים יתעבו ‬<br /> ‫ לכן יען בושסכם על דל ומשאת בר תקחו ממנו בתי גזית בניתם ולא תשבו בם כרמי חמד נטעתם ולא תשתו את יינם ‬<br /> ‫ כי ידעתי רבים פשעיכם ועצמים חטאתיכם צררי צדיק לקחי כפר ואביונים בשער הטו ‬<br /> ‫ לכן המשכיל בעת ההיא ידם כי עת רעה היא ‬<br /> ‫ דרשו טוב ואל רע למען תחיו ויהי כן יהוה אלהי צבאות אתכם כאשר אמרתם ‬<br /> ‫ שנאו רע ואהבו טוב והציגו בשער משפט אולי י͏חנן יהוה אלהי צבאות שארית יוסף ‬<br /> ‫ לכן כה אמר יהוה אלהי צבאות אדני בכל רחבות מספד ובכל חוצות יאמרו הו הו וקראו אכר אל אבל ומספד אל יודעי נהי ‬<br /> ‫ ובכל כרמים מספד כי אעבר בקרבך אמר יהוה ‬<br /> ‫ הוי המתאוים את יום יהוה למה זה לכם יום יהוה הוא חשך ולא אור ‬<br /> ‫ כאשר ינוס איש מפני הארי ופגעו הדב ובא הבית וסמך ידו על הקיר ונשכו הנחש ‬<br /> ‫ הלא חשך יום יהוה ולא אור ואפל ולא נגה לו ‬<br /> ‫ שנאתי מאסתי חגיכם ולא אריח בעצרתיכם ‬<br /> ‫ כי אם תעלו לי עלות ומנחתיכם לא ארצה ושלם מריאיכם לא אביט ‬<br /> ‫ הסר מעלי המון שריך וזמרת נבליך לא אשמע ‬<br /> ‫ ויגל כמים משפט וצדקה כנחל איתן ‬<br /> ‫ הזבחים ומנחה הגשתם לי במדבר ארבעים שנה בית ישראל ‬<br /> ‫ ונשאתם את סכות מלככם ואת כיון צלמיכם כוכב אלהיכם אשר עשיתם לכם ‬<br /> ‫ והגליתי אתכם מהלאה לדמשק אמר יהוה אלהי צבאות שמו ‬<br /> ‪xxxx‬<br /> ‪xxxx Chapter 6 (14 verses)‬<br /> ‪xxxx‬<br /> ‫ הוי השאננים בציון והבטחים בהר שמרון נקבי ראשית הגוים ובאו להם בית ישראל ‬<br /> ‫ עברו כלנה וראו ולכו משם חמת רבה ורדו גת פלשתים הטובים מן הממלכות האלה אם רב גבולם מגבלכם ‬<br /> ‫ המנדים ליום רע ותגישון שבת חמס ‬<br /> ‫ השכבים על מטות שן וסרחים על ערשותם ואכלים כרים מצאן ועגלים מתוך מרבק ‬<br /> ‫ הפרטים על פי הנבל כדויד חשבו להם כלי שיר ‬<br /> ‫ השתים במזרקי יין וראשית שמנים ימשחו ולא נחלו על שבר יוסף ‬<br /> ‫ לכן עתה יגלו בראש גלים וסר מרזח סרוחים ‬<br /> ‫ נשבע אדני יהוה בנפשו נאם יהוה אלהי צבאות מתאב אנכי את גאון יעקב וארמנתיו שנאתי והסגרתי עיר ומלאה ‬<br /> ‫ והיה אם יותרו עשרה אנשים בבית אחד ומתו ‬<br /> ‫ ונשאו דודו ומסרפו להוציא עצמים מן הבית ואמר לאשר בירכתי הבית העוד עמך ואמר אפס ואמר הס כי לא להזכיר בשם יהוה ‬<br /> ‫ כי הנה יהוה מצוה והכה הבית הגדול רסיסים והבית הקטן בקעים ‬<br /> ‫ הירצון בסלע סוסים אם יחרוש בבקרים כי הפכתם לראש משפט ופרי צדקה ללענה ‬<br /> ‫ השמחים ללא דבר האמרים הלוא בחזקנו לקחנו לנו קרנים ‬<br /> ‫ כי הנני מקים עליכם בית ישראל נאם יהוה אלהי הצבאות גוי ולחצו אתכם מלבוא חמת עד נחל הערבה ‬<br /> ‪xxxx‬<br /> ‪xxxx Chapter 7 (17 verses)‬<br /> ‪xxxx‬<br /> ‫ כה הראני אדני יהוה והנה יוצר גבי בתחלת עלות הלקש והנה לקש אחר גזי המלך ‬<br /> ‫ והיה אם כלה לאכול את עשב הארץ ואמר אדני יהוה סלח נא מי יקום יעקב כי קטן הוא ‬<br /> ‫ נחם יהוה על זאת לא תהיה אמר יהוה ‬<br /> ‫ כה הראני אדני יהוה והנה קרא לרב באש אדני יהוה ותאכל את תהום רבה ואכלה את החלק ‬<br /> ‫ ואמר אדני יהוה חדל נא מי יקום יעקב כי קטן הוא ‬<br /> ‫ נחם יהוה על זאת גם היא לא תהיה אמר אדני יהוה ‬<br /> ‫ כה הראני והנה אדני נצב על חומת אנך ובידו אנך ‬<br /> ‫ ויאמר יהוה אלי מה אתה ראה עמוס ואמר אנך ויאמר אדני הנני שם אנך בקרב עמי ישראל לא אוסיף עוד עבור לו ‬<br /> ‫ ונשמו במות ישחק ומקדשי ישראל יחרבו וקמתי על בית ירבעם בחרב ‬<br /> ‫ וישלח אמציה כהן בית אל אל ירבעם מלך ישראל לאמר קשר עליך עמוס בקרב בית ישראל לא תוכל הארץ להכיל את כל דבריו ‬<br /> ‫ כי כה אמר עמוס בחרב ימות ירבעם וישראל גלה יגלה מעל אדמתו ‬<br /> ‫ ויאמר אמציה אל עמוס חזה לך ברח לך אל ארץ יהודה ואכל שם לחם ושם תנבא ‬<br /> ‫ ובית אל לא תוסיף עוד להנבא כי מקדש מלך הוא ובית ממלכה הוא ‬<br /> ‫ ויען עמוס ויאמר אל אמציה לא נביא אנכי ולא בן נביא אנכי כי בוקר אנכי ובולס שקמים ‬<br /> ‫ ויקחני יהוה מאחרי הצאן ויאמר אלי יהוה לך הנבא אל עמי ישראל ‬<br /> ‫ ועתה שמע דבר יהוה אתה אמר לא תנבא על ישראל ולא תטיף על בית ישחק ‬<br /> ‫ לכן כה אמר יהוה אשתך בעיר תזנה ובניך ובנתיך בחרב יפלו ואדמתך בחבל תחלק ואתה על אדמה טמאה תמות וישראל גלה יגלה מעל אדמתו ‬<br /> ‪xxxx‬<br /> ‪xxxx Chapter 8 (14 verses)‬<br /> ‪xxxx‬<br /> ‫ כה הראני אדני יהוה והנה כלוב קיץ ‬<br /> ‫ ויאמר מה אתה ראה עמוס ואמר כלוב קיץ ויאמר יהוה אלי בא הקץ אל עמי ישראל לא אוסיף עוד עבור לו ‬<br /> ‫ והילילו שירות היכל ביום ההוא נאם אדני יהוה רב הפגר בכל מקום השליך הס ‬<br /> ‫ שמעו זאת השאפים אביון ולשבית עניי ארץ ‬<br /> ‫ לאמר מתי יעבר החדש ונשבירה שבר והשבת ונפתחה בר להקטין איפה ולהגדיל שקל ולעות מאזני מרמה ‬<br /> ‫ לקנות בכסף דלים ואביון בעבור נעלים ומפל בר נשביר ‬<br /> ‫ נשבע יהוה בגאון יעקב אם אשכח לנצח כל מעשיהם ‬<br /> ‫ העל זאת לא תרגז הארץ ואבל כל יושב בה ועלתה כאר כלה ונגרשה ונשקעה כיאור מצרים ‬<br /> ‫ והיה ביום ההוא נאם אדני יהוה והבאתי השמש בצהרים והחשכתי לארץ ביום אור ‬<br /> ‫ והפכתי חגיכם לאבל וכל שיריכם לקינה והעליתי על כל מתנים שק ועל כל ראש קרחה ושמתיה כאבל יחיד ואחריתה כיום מר ‬<br /> ‫ הנה ימים באים נאם אדני יהוה והשלחתי רעב בארץ לא רעב ללחם ולא צמא למים כי אם לשמע את דברי יהוה ‬<br /> ‫ ונעו מים עד ים ומצפון ועד מזרח ישוטטו לבקש את דבר יהוה ולא ימצאו ‬<br /> ‫ ביום ההוא תתעלפנה הבתולת היפות והבחורים בצמא ‬<br /> ‫ הנשבעים באשמת שמרון ואמרו חי אלהיך דן וחי דרך באר שבע ונפלו ולא יקומו עוד ‬<br /> ‪xxxx‬<br /> ‪xxxx Chapter 9 (15 verses)‬<br /> ‪xxxx‬<br /> ‫ ראיתי את אדני נצב על המזבח ויאמר הך הכפתור וירעשו הספים ובצעם בראש כלם ואחריתם בחרב אהרג לא ינוס להם נס ולא ימלט להם פליט ‬<br /> ‫ אם יחתרו בשאול משם ידי תקחם ואם יעלו השמים משם אורידם ‬<br /> ‫ ואם יחבאו בראש הכרמל משם אחפש ולקחתים ואם יסתרו מנגד עיני בקרקע הים משם אצוה את הנחש ונשכם ‬<br /> ‫ ואם ילכו בשבי לפני איביהם משם אצוה את החרב והרגתם ושמתי עיני עליהם לרעה ולא לטובה ‬<br /> ‫ ואדני יהוה הצבאות הנוגע בארץ ותמוג ואבלו כל יושבי בה ועלתה כיאר כלה ושקעה כיאר מצרים ‬<br /> ‫ הבונה בשמים מעלותיו ואגדתו על ארץ יסדה הקרא למי הים וישפכם על פני הארץ יהוה שמו ‬<br /> ‫ הלוא כבני כשיים אתם לי בני ישראל נאם יהוה הלוא את ישראל העליתי מארץ מצרים ופלשתיים מכפתור וארם מקיר ‬<br /> ‫ הנה עיני אדני יהוה בממלכה החטאה והשמדתי אתה מעל פני האדמה אפס כי לא השמיד אשמיד את בית יעקב נאם יהוה ‬<br /> ‫ כי הנה אנכי מצוה והנעותי בכל הגוים את בית ישראל כאשר ינוע בכברה ולא יפול צרור ארץ ‬<br /> ‫ בחרב ימותו כל חטאי עמי האמרים לא תגיש ותקדים בעדינו הרעה ‬<br /> ‫ ביום ההוא אקים את סכת דויד הנפלת וגדרתי את פרציהן והרסתיו אקים ובניתיה כימי עולם ‬<br /> ‫ למען יירשו את שארית אדום וכל הגוים אשר נקרא שמי עליהם נאם יהוה עשה זאת ‬<br /> ‫ הנה ימים באים נאם יהוה ונגש חורש בקצר ודרך ענבים במשך הזרע והטיפו ההרים עסיס וכל הגבעות תתמוגגנה ‬<br /> ‫ ושבתי את שבות עמי ישראל ובנו ערים נשמות וישבו ונטעו כרמים ושתו את יינם ועשו גנות ואכלו את פריהם ‬<br /> ‫ ונטעתים על אדמתם ולא ינתשו עוד מעל אדמתם אשר נתתי להם אמר יהוה אלהיך ‬<br /> ‪xxxx‬<br /> ‪xxxx End of Amos (9 chapters, 146 verses).</div>

Pig