https://sensusplenior.net/wiki/index.php?action=history&feed=atom&title=Leningrad%3AHo 2026-10-17T20:51:16Z Revision history for this page on the wiki MediaWiki 1.28.3 https://sensusplenior.net/wiki/index.php?title=Leningrad:Ho&diff=33974&oldid=prev 2022-04-25T09:41:02Z

<p>Created page with &quot;‪xxxx Unicode/XML Leningrad Codex [UXLC 1.4]‬ ‪xxxx Build: 26.5 - 1 April 2022 00:00‬ ‪xxxx Layout: Qere-only; Content: Consonants.‬ ‪xxxx‬ ‪x...&quot;</p> <p><b>New page</b></p><div>‪xxxx Unicode/XML Leningrad Codex [UXLC 1.4]‬<br /> ‪xxxx Build: 26.5 - 1 April 2022 00:00‬<br /> ‪xxxx Layout: Qere-only; Content: Consonants.‬<br /> ‪xxxx‬<br /> ‪xxxx Hosea (14 chapters, 197 verses).‬<br /> ‪xxxx‬<br /> ‪xxxx Chapter 1 (9 verses)‬<br /> ‪xxxx‬<br /> ‫ דבר יהוה אשר היה אל הושע בן בארי בימי עזיה יותם אחז יחזקיה מלכי יהודה ובימי ירבעם בן יואש מלך ישראל ‬<br /> ‫ תחלת דבר יהוה בהושע ויאמר יהוה אל הושע לך קח לך אשת זנונים וילדי זנונים כי זנה תזנה הארץ מאחרי יהוה ‬<br /> ‫ וילך ויקח את גמר בת דבלים ותהר ותלד לו בן ‬<br /> ‫ ויאמר יהוה אליו קרא שמו יזרעאל כי עוד מעט ופקדתי את דמי יזרעאל על בית יהוא והשבתי ממלכות בית ישראל ‬<br /> ‫ והיה ביום ההוא ושברתי את קשת ישראל בעמק יזרעאל ‬<br /> ‫ ותהר עוד ותלד בת ויאמר לו קרא שמה לא רחמה כי לא אוסיף עוד ארחם את בית ישראל כי נשא אשא להם ‬<br /> ‫ ואת בית יהודה ארחם והושעתים ביהוה אלהיהם ולא אושיעם בקשת ובחרב ובמלחמה בסוסים ובפרשים ‬<br /> ‫ ותגמל את לא רחמה ותהר ותלד בן ‬<br /> ‫ ויאמר קרא שמו לא עמי כי אתם לא עמי ואנכי לא אהיה לכם ‬<br /> ‪xxxx‬<br /> ‪xxxx Chapter 2 (25 verses)‬<br /> ‪xxxx‬<br /> ‫ והיה מספר בני ישראל כחול הים אשר לא ימד ולא יספר והיה במקום אשר יאמר להם לא עמי אתם יאמר להם בני אל חי ‬<br /> ‫ ונקבצו בני יהודה ובני ישראל יחדו ושמו להם ראש אחד ועלו מן הארץ כי גדול יום יזרעאל ‬<br /> ‫ אמרו לאחיכם עמי ולאחותיכם רחמה ‬<br /> ‫ ריבו באמכם ריבו כי היא לא אשתי ואנכי לא אישה ותסר זנוניה מפניה ונאפופיה מבין שדיה ‬<br /> ‫ פן אפשיטנה ערמה והצגתיה כיום הולדה ושמתיה כמדבר ושתה כארץ ציה והמתיה בצמא ‬<br /> ‫ ואת בניה לא ארחם כי בני זנונים המה ‬<br /> ‫ כי זנתה אמם הבישה הורתם כי אמרה אלכה אחרי מאהבי נתני לחמי ומימי צמרי ופשתי שמני ושקויי ‬<br /> ‫ לכן הנני שך את דרכך בסירים וגדרתי את גדרה ונתיבותיה לא תמצא ‬<br /> ‫ ורדפה את מאהביה ולא תשיג אתם ובקשתם ולא תמצא ואמרה אלכה ואשובה אל אישי הראשון כי טוב לי אז מעתה ‬<br /> ‫ והיא לא ידעה כי אנכי נתתי לה הדגן והתירוש והיצהר וכסף הרביתי לה וזהב עשו לבעל ‬<br /> ‫ לכן אשוב ולקחתי דגני בעתו ותירושי במועדו והצלתי צמרי ופשתי לכסות את ערותה ‬<br /> ‫ ועתה אגלה את נבלתה לעיני מאהביה ואיש לא יצילנה מידי ‬<br /> ‫ והשבתי כל משושה חגה חדשה ושבתה וכל מועדה ‬<br /> ‫ והשמתי גפנה ותאנתה אשר אמרה אתנה המה לי אשר נתנו לי מאהבי ושמתים ליער ואכלתם חית השדה ‬<br /> ‫ ופקדתי עליה את ימי הבעלים אשר תקטיר להם ותעד נזמה וחליתה ותלך אחרי מאהביה ואתי שכחה נאם יהוה ‬<br /> ‫ לכן הנה אנכי מפתיה והלכתיה המדבר ודברתי על לבה ‬<br /> ‫ ונתתי לה את כרמיה משם ואת עמק עכור לפתח תקוה וענתה שמה כימי נעוריה וכיום עלתה מארץ מצרים ‬<br /> ‫ והיה ביום ההוא נאם יהוה תקראי אישי ולא תקראי לי עוד בעלי ‬<br /> ‫ והסרתי את שמות הבעלים מפיה ולא יזכרו עוד בשמם ‬<br /> ‫ וכרתי להם ברית ביום ההוא עם חית השדה ועם עוף השמים ורמש האדמה וקשת וחרב ומלחמה אשבור מן הארץ והשכבתים לבטח ‬<br /> ‫ וארשתיך לי לעולם וארשתיך לי בצדק ובמשפט ובחסד וברחמים ‬<br /> ‫ וארשתיך לי באמונה וידעת את יהוה ‬<br /> ‫ והיה ביום ההוא אענה נאם יהוה אענה את השמים והם יענו את הארץ ‬<br /> ‫ והארץ תענה את הדגן ואת התירוש ואת היצהר והם יענו את יזרעאל ‬<br /> ‫ וזרעתיה לי בארץ ורחמתי את לא רחמה ואמרתי ללא עמי עמי אתה והוא יאמר אלהי ‬<br /> ‪xxxx‬<br /> ‪xxxx Chapter 3 (5 verses)‬<br /> ‪xxxx‬<br /> ‫ ויאמר יהוה אלי עוד לך אהב אשה אהבת רע ומנאפת כאהבת יהוה את בני ישראל והם פנים אל אלהים אחרים ואהבי אשישי ענבים ‬<br /> ‫ ואכרה לי בחמשה עשר כסף וחמר שערים ולתך שערים ‬<br /> ‫ ואמר אליה ימים רבים תשבי לי לא תזני ולא תהיי לאיש וגם אני אליך ‬<br /> ‫ כי ימים רבים ישבו בני ישראל אין מלך ואין שר ואין זבח ואין מצבה ואין אפוד ותרפים ‬<br /> ‫ אחר ישבו בני ישראל ובקשו את יהוה אלהיהם ואת דוד מלכם ופחדו אל יהוה ואל טובו באחרית הימים ‬<br /> ‪xxxx‬<br /> ‪xxxx Chapter 4 (19 verses)‬<br /> ‪xxxx‬<br /> ‫ שמעו דבר יהוה בני ישראל כי ריב ליהוה עם יושבי הארץ כי אין אמת ואין חסד ואין דעת אלהים בארץ ‬<br /> ‫ אלה וכחש ורצח וגנב ונאף פרצו ודמים בדמים נגעו ‬<br /> ‫ על כן תאבל הארץ ואמלל כל יושב בה בחית השדה ובעוף השמים וגם דגי הים יאספו ‬<br /> ‫ אך איש אל ירב ואל יוכח איש ועמך כמריבי כהן ‬<br /> ‫ וכשלת היום וכשל גם נביא עמך לילה ודמיתי אמך ‬<br /> ‫ נדמו עמי מבלי הדעת כי אתה הדעת מאסת ואמאסאך מכהן לי ותשכח תורת אלהיך אשכח בניך גם אני ‬<br /> ‫ כרבם כן חטאו לי כבודם בקלון אמיר ‬<br /> ‫ חטאת עמי יאכלו ואל עונם ישאו נפשו ‬<br /> ‫ והיה כעם ככהן ופקדתי עליו דרכיו ומעלליו אשיב לו ‬<br /> ‫ ואכלו ולא ישבעו הזנו ולא יפרצו כי את יהוה עזבו לשמר ‬<br /> ‫ זנות ויין ותירוש יקח לב ‬<br /> ‫ עמי בעצו ישאל ומקלו יגיד לו כי רוח זנונים התעה ויזנו מתחת אלהיהם ‬<br /> ‫ על ראשי ההרים יזבחו ועל הגבעות יקטרו תחת אלון ולבנה ואלה כי טוב צלה על כן תזנינה בנותיכם וכלותיכם תנאפנה ‬<br /> ‫ לא אפקוד על בנותיכם כי תזנינה ועל כלותיכם כי תנאפנה כי הם עם הזנות יפרדו ועם הקדשות יזבחו ועם לא יבין ילבט ‬<br /> ‫ אם זנה אתה ישראל אל יאשם יהודה ואל תבאו הגלגל ואל תעלו בית און ואל תשבעו חי יהוה ‬<br /> ‫ כי כפרה סררה סרר ישראל עתה ירעם יהוה ככבש במרחב ‬<br /> ‫ חבור עצבים אפרים הנח לו ‬<br /> ‫ סר סבאם הזנה הזנו אהבו הבו קלון מגניה ‬<br /> ‫ צרר רוח אותה בכנפיה ויבשו מזבחותם ‬<br /> ‪xxxx‬<br /> ‪xxxx Chapter 5 (15 verses)‬<br /> ‪xxxx‬<br /> ‫ שמעו זאת הכהנים והקשיבו בית ישראל ובית המלך האזינו כי לכם המשפט כי פח הייתם למצפה ורשת פרושה על תבור ‬<br /> ‫ ושחטה שטים העמיקו ואני מוסר לכלם ‬<br /> ‫ אני ידעתי אפרים וישראל לא נכחד ממני כי עתה הזנית אפרים נטמא ישראל ‬<br /> ‫ לא יתנו מעלליהם לשוב אל אלהיהם כי רוח זנונים בקרבם ואת יהוה לא ידעו ‬<br /> ‫ וענה גאון ישראל בפניו וישראל ואפרים יכשלו בעונם כשל גם יהודה עמם ‬<br /> ‫ בצאנם ובבקרם ילכו לבקש את יהוה ולא ימצאו חלץ מהם ‬<br /> ‫ ביהוה בגדו כי בנים זרים ילדו עתה יאכלם חדש את חלקיהם ‬<br /> ‫ תקעו שופר בגבעה חצצרה ברמה הריעו בית און אחריך בנימין ‬<br /> ‫ אפרים לשמה תהיה ביום תוכחה בשבטי ישראל הודעתי נאמנה ‬<br /> ‫ היו שרי יהודה כמסיגי גבול עליהם אשפוך כמים עברתי ‬<br /> ‫ עשוק אפרים רצוץ משפט כי הואיל הלך אחרי צו ‬<br /> ‫ ואני כעש לאפרים וכרקב לבית יהודה ‬<br /> ‫ וירא אפרים את חליו ויהודה את מזרו וילך אפרים אל אשור וישלח אל מלך ירב והוא לא יוכל לרפא לכם ולא יגהה מכם מזור ‬<br /> ‫ כי אנכי כשחל לאפרים וככפיר לבית יהודה אני אני אטרף ואלך אשא ואין מציל ‬<br /> ‫ אלך אשובה אל מקומי עד אשר יאשמו ובקשו פני בצר להם ישחרנני ‬<br /> ‪xxxx‬<br /> ‪xxxx Chapter 6 (11 verses)‬<br /> ‪xxxx‬<br /> ‫ לכו ונשובה אל יהוה כי הוא טרף וירפאנו יך ויחבשנו ‬<br /> ‫ יחינו מימים ביום השלישי יקמנו ונחיה לפניו ‬<br /> ‫ ונדעה נרדפה לדעת את יהוה כשחר נכון מוצאו ויבוא כגשם לנו כמלקוש יורה ארץ ‬<br /> ‫ מה אעשה לך אפרים מה אעשה לך יהודה וחסדכם כענן בקר וכטל משכים הלך ‬<br /> ‫ על כן חצבתי בנביאים הרגתים באמרי פי ומשפטיך אור יצא ‬<br /> ‫ כי חסד חפצתי ולא זבח ודעת אלהים מעלות ‬<br /> ‫ והמה כאדם עברו ברית שם בגדו בי ‬<br /> ‫ גלעד קרית פעלי און עקבה מדם ‬<br /> ‫ וכחכי איש גדודים חבר כהנים דרך ירצחו שכמה כי זמה עשו ‬<br /> ‫ בבית ישראל ראיתי שערוריה שם זנות לאפרים נטמא ישראל ‬<br /> ‫ גם יהודה שת קציר לך בשובי שבות עמי ‬<br /> ‪xxxx‬<br /> ‪xxxx Chapter 7 (16 verses)‬<br /> ‪xxxx‬<br /> ‫ כרפאי לישראל ונגלה עון אפרים ורעות שמרון כי פעלו שקר וגנב יבוא פשט גדוד בחוץ ‬<br /> ‫ ובל יאמרו ללבבם כל רעתם זכרתי עתה סבבום מעלליהם נגד פני היו ‬<br /> ‫ ברעתם ישמחו מלך ובכחשיהם שרים ‬<br /> ‫ כלם מנאפים כמו תנור בערה מאפה ישבות מעיר מלוש בצק עד חמצתו ‬<br /> ‫ יום מלכנו החלו שרים חמת מיין משך ידו את לצצים ‬<br /> ‫ כי קרבו כתנור לבם בארבם כל הלילה ישן אפהם בקר הוא בער כאש להבה ‬<br /> ‫ כלם יחמו כתנור ואכלו את שפטיהם כל מלכיהם נפלו אין קרא בהם אלי ‬<br /> ‫ אפרים בעמים הוא יתבולל אפרים היה עגה בלי הפוכה ‬<br /> ‫ אכלו זרים כחו והוא לא ידע גם שיבה זרקה בו והוא לא ידע ‬<br /> ‫ וענה גאון ישראל בפניו ולא שבו אל יהוה אלהיהם ולא בקשהו בכל זאת ‬<br /> ‫ ויהי אפרים כיונה פותה אין לב מצרים קראו אשור הלכו ‬<br /> ‫ כאשר ילכו אפרוש עליהם רשתי כעוף השמים אורידם איסרם כשמע לעדתם ‬<br /> ‫ אוי להם כי נדדו ממני שד להם כי פשעו בי ואנכי אפדם והמה דברו עלי כזבים ‬<br /> ‫ ולא זעקו אלי בלבם כי יילילו על משכבותם על דגן ותירוש יתגוררו יסורו בי ‬<br /> ‫ ואני יסרתי חזקתי זרועתם ואלי יחשבו רע ‬<br /> ‫ ישובו לא על היו כקשת רמיה יפלו בחרב שריהם מזעם לשונם זו לעגם בארץ מצרים ‬<br /> ‪xxxx‬<br /> ‪xxxx Chapter 8 (14 verses)‬<br /> ‪xxxx‬<br /> ‫ אל חכך שפר כנשר על בית יהוה יען עברו בריתי ועל תורתי פשעו ‬<br /> ‫ לי יזעקו אלהי ידענוך ישראל ‬<br /> ‫ זנח ישראל טוב אויב ירדפו ‬<br /> ‫ הם המליכו ולא ממני השירו ולא ידעתי כספם וזהבם עשו להם עצבים למען יכרת ‬<br /> ‫ זנח עגלך שמרון חרה אפי בם עד מתי לא יוכלו נקין ‬<br /> ‫ כי מישראל והוא חרש עשהו ולא אלהים הוא כי שבבים יהיה עגל שמרון ‬<br /> ‫ כי רוח יזרעו וסופתה יקצרו קמה אין לו צמח בלי יעשה קמח אולי יעשה זרים יבלעהו ‬<br /> ‫ נבלע ישראל עתה היו בגוים ככלי אין חפץ בו ‬<br /> ‫ כי המה עלו אשור פרא בודד לו אפרים התנו אהבים ‬<br /> ‫ גם כי יתנו בגוים עתה אקבצם ויחלו מעט ממשא מלך שרים ‬<br /> ‫ כי הרבה אפרים מזבחת לחטא היו לו מזבחות לחטא ‬<br /> ‫ אכתב לו רבי תורתי כמו זר נחשבו ‬<br /> ‫ זבחי הבהבי יזבחו בשר ויאכלו יהוה לא רצם עתה יזכר עונם ויפקד חטאותם המה מצרים ישובו ‬<br /> ‫ וישכח ישראל את עשהו ויבן היכלות ויהודה הרבה ערים בצרות ושלחתי אש בעריו ואכלה ארמנתיה ‬<br /> ‪xxxx‬<br /> ‪xxxx Chapter 9 (17 verses)‬<br /> ‪xxxx‬<br /> ‫ אל תשמח ישראל אל גיל כעמים כי זנית מעל אלהיך אהבת אתנן על כל גרנות דגן ‬<br /> ‫ גרן ויקב לא ירעם ותירוש יכחש בה ‬<br /> ‫ לא ישבו בארץ יהוה ושב אפרים מצרים ובאשור טמא יאכלו ‬<br /> ‫ לא יסכו ליהוה יין ולא יערבו לו זבחיהם כלחם אונים להם כל אכליו יטמאו כי לחמם לנפשם לא יבוא בית יהוה ‬<br /> ‫ מה תעשו ליום מועד וליום חג יהוה ‬<br /> ‫ כי הנה הלכו משד מצרים תקבצם מף תקברם מחמד לכספם קמוש יירשם חוח באהליהם ‬<br /> ‫ באו ימי הפקדה באו ימי השלם ידעו ישראל אויל הנביא משגע איש הרוח על רב עונך ורבה משטמה ‬<br /> ‫ צפה אפרים עם אלהי נביא פח יקוש על כל דרכיו משטמה בבית אלהיו ‬<br /> ‫ העמיקו שחתו כימי הגבעה יזכור עונם יפקוד חטאותם ‬<br /> ‫ כענבים במדבר מצאתי ישראל כבכורה בתאנה בראשיתה ראיתי אבותיכם המה באו בעל פעור וינזרו לבשת ויהיו שקוצים כאהבם ‬<br /> ‫ אפרים כעוף יתעופף כבודם מלדה ומבטן ומהריון ‬<br /> ‫ כי אם יגדלו את בניהם ושכלתים מאדם כי גם אוי להם בשורי מהם ‬<br /> ‫ אפרים כאשר ראיתי לצור שתולה בנוה ואפרים להוציא אל הרג בניו ‬<br /> ‫ תן להם יהוה מה תתן תן להם רחם משכיל ושדים צמקים ‬<br /> ‫ כל רעתם בגלגל כי שם שנאתים על רע מעלליהם מביתי אגרשם לא אוסף אהבתם כל שריהם סררים ‬<br /> ‫ הכה אפרים שרשם יבש פרי בל יעשון גם כי ילדון והמתי מחמדי בטנם ‬<br /> ‫ ימאסם אלהי כי לא שמעו לו ויהיו נדדים בגוים ‬<br /> ‪xxxx‬<br /> ‪xxxx Chapter 10 (15 verses)‬<br /> ‪xxxx‬<br /> ‫ גפן בוקק ישראל פרי ישוה לו כרב לפריו הרבה למזבחות כטוב לארצו היטיבו מצבות ‬<br /> ‫ חלק לבם עתה יאשמו הוא יערף מזבחותם ישדד מצבותם ‬<br /> ‫ כי עתה יאמרו אין מלך לנו כי לא יראנו את יהוה והמלך מה יעשה לנו ‬<br /> ‫ דברו דברים אלות שוא כרת ברית ופרח כראש משפט על תלמי שדי ‬<br /> ‫ לעגלות בית און יגורו שכן שמרון כי אבל עליו עמו וכמריו עליו יגילו על כבודו כי גלה ממנו ‬<br /> ‫ גם אותו לאשור יובל מנחה למלך ירב בשנה אפרים יקח ויבוש ישראל מעצתו ‬<br /> ‫ נדמה שמרון מלכה כקצף על פני מים ‬<br /> ‫ ונשמדו במות און חטאת ישראל קוץ ודרדר יעלה על מזבחותם ואמרו להרים כסונו ולגבעות נפלו עלינו ‬<br /> ‫ מימי הגבעה חטאת ישראל שם עמדו לא תשיגם בגבעה מלחמה על בני עלוה ‬<br /> ‫ באותי ואסרם ואספו עליהם עמים באסרם לשתי עונתם ‬<br /> ‫ ואפרים עגלה מלמדה אהבתי לדוש ואני עברתי על טוב צוארה ארכיב אפרים יחרוש יהודה ישדד לו יעקב ‬<br /> ‫ זרעו לכם לצדקה קצרו לפי חסד נירו לכם ניר ועת לדרוש את יהוה עד יבוא וירה צדק לכם ‬<br /> ‫ חרשתם רשע עולתה קצרתם אכלתם פרי כחש כי בטחת בדרכך ברב גבוריך ‬<br /> ‫ וקאם שאון בעמך וכל מבצריך יושד כשד שלמן בית ארבאל ביום מלחמה אם על בנים רטשה ‬<br /> ‫ ככה עשה לכם בית אל מפני רעת רעתכם בשחר נדמה נדמה מלך ישראל ‬<br /> ‪xxxx‬<br /> ‪xxxx Chapter 11 (11 verses)‬<br /> ‪xxxx‬<br /> ‫ כי נער ישראל ואהבהו וממצרים קראתי לבני ‬<br /> ‫ קראו להם כן הלכו מפניהם לבעלים יזבחו ולפסלים יקטרון ‬<br /> ‫ ואנכי תרגלתי לאפרים קחם על זרועתיו ולא ידעו כי רפאתים ‬<br /> ‫ בחבלי אדם אמשכם בעבתות אהבה ואהיה להם כמרימי על על לחיהם ואט אליו אוכיל ‬<br /> ‫ לא ישוב אל ארץ מצרים ואשור הוא מלכו כי מאנו לשוב ‬<br /> ‫ וחלה חרב בעריו וכלתה בדיו ואכלה ממעצותיהם ‬<br /> ‫ ועמי תלואים למשובתי ואל על יקראהו יחד לא ירומם ‬<br /> ‫ איך אתנך אפרים אמגנך ישראל איך אתנך כאדמה אשימך כצבאים נהפך עלי לבי יחד נכמרו נחומי ‬<br /> ‫ לא אעשה חרון אפי לא אשוב לשחת אפרים כי אל אנכי ולא איש בקרבך קדוש ולא אבוא בעיר ‬<br /> ‫ אחרי יהוה ילכו כאריה ישאג כי הוא ישאג ויחרדו בנים מים ‬<br /> ‫ יחרדו כצפור ממצרים וכיונה מארץ אשור והושבתים על בתיהם נאם יהוה ‬<br /> ‪xxxx‬<br /> ‪xxxx Chapter 12 (15 verses)‬<br /> ‪xxxx‬<br /> ‫ סבבני בכחש אפרים ובמרמה בית ישראל ויהודה עד רד עם אל ועם קדושים נאמן ‬<br /> ‫ אפרים רעה רוח ורדף קדים כל היום כזב ושד ירבה וברית עם אשור יכרתו ושמן למצרים יובל ‬<br /> ‫ וריב ליהוה עם יהודה ולפקד על יעקב כדרכיו כמעלליו ישיב לו ‬<br /> ‫ בבטן עקב את אחיו ובאונו שרה את אלהים ‬<br /> ‫ וישר אל מלאך ויכל בכה ויתחנן לו בית אל ימצאנו ושם ידבר עמנו ‬<br /> ‫ ויהוה אלהי הצבאות יהוה זכרו ‬<br /> ‫ ואתה באלהיך תשוב חסד ומשפט שמר וקוה אל אלהיך תמיד ‬<br /> ‫ כנען בידו מאזני מרמה לעשק אהב ‬<br /> ‫ ויאמר אפרים אך עשרתי מצאתי און לי כל יגיעי לא ימצאו לי עון אשר חטא ‬<br /> ‫ ואנכי יהוה אלהיך מארץ מצרים עד אושיבך באהלים כימי מועד ‬<br /> ‫ ודברתי על הנביאים ואנכי חזון הרביתי וביד הנביאים אדמה ‬<br /> ‫ אם גלעד און אך שוא היו בגלגל שורים זבחו גם מזבחותם כגלים על תלמי שדי ‬<br /> ‫ ויברח יעקב שדה ארם ויעבד ישראל באשה ובאשה שמר ‬<br /> ‫ ובנביא העלה יהוה את ישראל ממצרים ובנביא נשמר ‬<br /> ‫ הכעיס אפרים תמרורים ודמיו עליו יטוש וחרפתו ישיב לו אדניו ‬<br /> ‪xxxx‬<br /> ‪xxxx Chapter 13 (15 verses)‬<br /> ‪xxxx‬<br /> ‫ כדבר אפרים רתת נשא הוא בישראל ויאשם בבעל וימת ‬<br /> ‫ ועתה יוספו לחטא ויעשו להם מסכה מכספם כתבונם עצבים מעשה חרשים כלה להם הם אמרים זבחי אדם עגלים ישקון ‬<br /> ‫ לכן יהיו כענן בקר וכטל משכים הלך כמץ יסער מגרן וכעשן מארבה ‬<br /> ‫ ואנכי יהוה אלהיך מארץ מצרים ואלהים זולתי לא תדע ומושיע אין בלתי ‬<br /> ‫ אני ידעתיך במדבר בארץ תלאבות ‬<br /> ‫ כמרעיתם וישבעו שבעו וירם לבם על כן שכחוני ‬<br /> ‫ ואהי להם כמו שחל כנמר על דרך אשור ‬<br /> ‫ אפגשם כדב שכול ואקרע סגור לבם ואכלם שם כלביא חית השדה תבקעם ‬<br /> ‫ שחתך ישראל כי בי בעזרך ‬<br /> ‫ אהי מלכך אפוא ויושיעך בכל עריך ושפטיך אשר אמרת תנה לי מלך ושרים ‬<br /> ‫ אתן לך מלך באפי ואקח בעברתי ‬<br /> ‫ צרור עון אפרים צפונה חטאתו ‬<br /> ‫ חבלי יולדה יבאו לו הוא בן לא חכם כי עת לא יעמד במשבר בנים ‬<br /> ‫ מיד שאול אפדם ממות אגאלם אהי דבריך מות אהי קטבך שאול נחם יסתר מעיני ‬<br /> ‫ כי הוא בן אחים יפריא יבוא קדים רוח יהוה ממדבר עלה ויבוש מקורו ויחרב מעינו הוא ישסה אוצר כל כלי חמדה ‬<br /> ‪xxxx‬<br /> ‪xxxx Chapter 14 (10 verses)‬<br /> ‪xxxx‬<br /> ‫ תאשם שמרון כי מרתה באלהיה בחרב יפלו עלליהם ירטשו והריותיו יבקעו ‬<br /> ‫ שובה ישראל עד יהוה אלהיך כי כשלת בעונך ‬<br /> ‫ קחו עמכם דברים ושובו אל יהוה אמרו אליו כל תשא עון וקח טוב ונשלמה פרים שפתינו ‬<br /> ‫ אשור לא יושיענו על סוס לא נרכב ולא נאמר עוד אלהינו למעשה ידינו אשר בך ירחם יתום ‬<br /> ‫ ארפא משובתם אהבם נדבה כי שב אפי ממנו ‬<br /> ‫ אהיה כטל לישראל יפרח כשושנה ויך שרשיו כלבנון ‬<br /> ‫ ילכו ינקותיו ויהי כזית הודו וריח לו כלבנון ‬<br /> ‫ ישבו ישבי בצלו יחיו דגן ויפרחו כגפן זכרו כיין לבנון ‬<br /> ‫ אפרים מה לי עוד לעצבים אני עניתי ואשורנו אני כברוש רענן ממני פריך נמצא ‬<br /> ‫ מי חכם ויבן אלה נבון וידעם כי ישרים דרכי יהוה וצדקים ילכו בם ופשעים יכשלו בם ‬<br /> ‪xxxx‬<br /> ‪xxxx End of Hosea (14 chapters, 197 verses).</div>

Pig