https://sensusplenior.net/wiki/index.php?action=history&feed=atom&title=Leningrad%3AMal 2026-10-17T20:45:14Z Revision history for this page on the wiki MediaWiki 1.28.3 https://sensusplenior.net/wiki/index.php?title=Leningrad:Mal&diff=33984&oldid=prev 2022-04-25T09:45:57Z

<p>Created page with &quot;‪xxxx Unicode/XML Leningrad Codex [UXLC 1.4]‬ ‪xxxx Build: 26.5 - 1 April 2022 00:00‬ ‪xxxx Layout: Qere-only; Content: Consonants.‬ ‪xxxx‬ ‪x...&quot;</p> <p><b>New page</b></p><div>‪xxxx Unicode/XML Leningrad Codex [UXLC 1.4]‬<br /> ‪xxxx Build: 26.5 - 1 April 2022 00:00‬<br /> ‪xxxx Layout: Qere-only; Content: Consonants.‬<br /> ‪xxxx‬<br /> ‪xxxx Malachi (3 chapters, 55 verses).‬<br /> ‪xxxx‬<br /> ‪xxxx Chapter 1 (14 verses)‬<br /> ‪xxxx‬<br /> ‫ משא דבר יהוה אל ישראל ביד מלאכי ‬<br /> ‫ אהבתי אתכם אמר יהוה ואמרתם במה אהבתנו הלוא אח עשו ליעקב נאם יהוה ואהב את יעקב ‬<br /> ‫ ואת עשו שנאתי ואשים את הריו שממה ואת נחלתו לתנות מדבר ‬<br /> ‫ כי תאמר אדום רששנו ונשוב ונבנה חרבות כה אמר יהוה צבאות המה יבנו ואני אהרוס וקראו להם גבול רשעה והעם אשר זעם יהוה עד עולם ‬<br /> ‫ ועיניכם תראינה ואתם תאמרו יגדל יהוה מעל לגבול ישראל ‬<br /> ‫ בן יכבד אב ועבד אדניו ואם אב אני איה כבודי ואם אדונים אני איה מוראי אמר יהוה צבאות לכם הכהנים בוזי שמי ואמרתם במה בזינו את שמך ‬<br /> ‫ מגישים על מזבחי לחם מגאל ואמרתם במה גאלנוך באמרכם שלחן יהוה נבזה הוא ‬<br /> ‫ וכי תגשון עור לזבח אין רע וכי תגישו פסח וחלה אין רע הקריבהו נא לפחתך הירצך או הישא פניך אמר יהוה צבאות ‬<br /> ‫ ועתה חלו נא פני אל ויחננו מידכם היתה זאת הישא מכם פנים אמר יהוה צבאות ‬<br /> ‫ מי גם בכם ויסגר דלתים ולא תאירו מזבחי חנם אין לי חפץ בכם אמר יהוה צבאות ומנחה לא ארצה מידכם ‬<br /> ‫ כי ממזרח שמש ועד מבואו גדול שמי בגוים ובכל מקום מקטר מגש לשמי ומנחה טהורה כי גדול שמי בגוים אמר יהוה צבאות ‬<br /> ‫ ואתם מחללים אותו באמרכם שלחן אדני מגאל הוא וניבו נבזה אכלו ‬<br /> ‫ ואמרתם הנה מתלאה והפחתם אותו אמר יהוה צבאות והבאתם גזול ואת הפסח ואת החולה והבאתם את המנחה הארצה אותה מידכם אמר יהוה ‬<br /> ‫ וארור נוכל ויש בעדרו זכר ונדר וזבח משחת לאדני כי מלך גדול אני אמר יהוה צבאות ושמי נורא בגוים ‬<br /> ‪xxxx‬<br /> ‪xxxx Chapter 2 (17 verses)‬<br /> ‪xxxx‬<br /> ‫ ועתה אליכם המצוה הזאת הכהנים ‬<br /> ‫ אם לא תשמעו ואם לא תשימו על לב לתת כבוד לשמי אמר יהוה צבאות ושלחתי בכם את המארה וארותי את ברכותיכם וגם ארותיה כי אינכם שמים על לב ‬<br /> ‫ הנני גער לכם את הזרע וזריתי פרש על פניכם פרש חגיכם ונשא אתכם אליו ‬<br /> ‫ וידעתם כי שלחתי אליכם את המצוה הזאת להיות בריתי את לוי אמר יהוה צבאות ‬<br /> ‫ בריתי היתה אתו החיים והשלום ואתנם לו מורא וייראני ומפני שמי נחת הוא ‬<br /> ‫ תורת אמת היתה בפיהו ועולה לא נמצא בשפתיו בשלום ובמישור הלך אתי ורבים השיב מעון ‬<br /> ‫ כי שפתי כהן ישמרו דעת ותורה יבקשו מפיהו כי מלאך יהוה צבאות הוא ‬<br /> ‫ ואתם סרתם מן הדרך הכשלתם רבים בתורה שחתם ברית הלוי אמר יהוה צבאות ‬<br /> ‫ וגם אני נתתי אתכם נבזים ושפלים לכל העם כפי אשר אינכם שמרים את דרכי ונשאים פנים בתורה ‬<br /> ‫ הלוא אב אחד לכלנו הלוא אל אחד בראנו מדוע נבגד איש באחיו לחלל ברית אבתינו ‬<br /> ‫ בגדה יהודה ותועבה נעשתה בישראל ובירושל͏ם כי חלל יהודה קדש יהוה אשר אהב ובעל בת אל נכר ‬<br /> ‫ יכרת יהוה לאיש אשר יעשנה ער וענה מאהלי יעקב ומגיש מנחה ליהוה צבאות ‬<br /> ‫ וזאת שנית תעשו כסות דמעה את מזבח יהוה בכי ואנקה מאין עוד פנות אל המנחה ולקחת רצון מידכם ‬<br /> ‫ ואמרתם על מה על כי יהוה העיד בינך ובין אשת נעוריך אשר אתה בגדתה בה והיא חברתך ואשת בריתך ‬<br /> ‫ ולא אחד עשה ושאר רוח לו ומה האחד מבקש זרע אלהים ונשמרתם ברוחכם ובאשת נעוריך אל יבגד ‬<br /> ‫ כי שנא שלח אמר יהוה אלהי ישראל וכסה חמס על לבושו אמר יהוה צבאות ונשמרתם ברוחכם ולא תבגדו ‬<br /> ‫ הוגעתם יהוה בדבריכם ואמרתם במה הוגענו באמרכם כל עשה רע טוב בעיני יהוה ובהם הוא חפץ או איה אלהי המשפט ‬<br /> ‪xxxx‬<br /> ‪xxxx Chapter 3 (24 verses)‬<br /> ‪xxxx‬<br /> ‫ הנני שלח מלאכי ופנה דרך לפני ופתאם יבוא אל היכלו האדון אשר אתם מבקשים ומלאך הברית אשר אתם חפצים הנה בא אמר יהוה צבאות ‬<br /> ‫ ומי מכלכל את יום בואו ומי העמד בהראותו כי הוא כאש מצרף וכברית מכבסים ‬<br /> ‫ וישב מצרף ומטהר כסף וטהר את בני לוי וזקק אתם כזהב וככסף והיו ליהוה מגישי מנחה בצדקה ‬<br /> ‫ וערבה ליהוה מנחת יהודה וירושל͏ם כימי עולם וכשנים קדמניות ‬<br /> ‫ וקרבתי אליכם למשפט והייתי עד ממהר במכשפים ובמנאפים ובנשבעים לשקר ובעשקי שכר שכיר אלמנה ויתום ומטי גר ולא יראוני אמר יהוה צבאות ‬<br /> ‫ כי אני יהוה לא שניתי ואתם בני יעקב לא כליתם ‬<br /> ‫ למימי אבתיכם סרתם מחקי ולא שמרתם שובו אלי ואשובה אליכם אמר יהוה צבאות ואמרתם במה נשוב ‬<br /> ‫ היקבע אדם אלהים כי אתם קבעים אתי ואמרתם במה קבענוך המעשר והתרומה ‬<br /> ‫ במארה אתם נארים ואתי אתם קבעים הגוי כלו ‬<br /> ‫ הביאו את כל המעשר אל בית האוצר ויהי טרף בביתי ובחנוני נא בזאת אמר יהוה צבאות אם לא אפתח לכם את ארבות השמים והריקתי לכם ברכה עד בלי די ‬<br /> ‫ וגערתי לכם באכל ולא ישחת לכם את פרי האדמה ולא תשכל לכם הגפן בשדה אמר יהוה צבאות ‬<br /> ‫ ואשרו אתכם כל הגוים כי תהיו אתם ארץ חפץ אמר יהוה צבאות ‬<br /> ‫ חזקו עלי דבריכם אמר יהוה ואמרתם מה נדברנו עליך ‬<br /> ‫ אמרתם שוא עבד אלהים ומה בצע כי שמרנו משמרתו וכי הלכנו קדרנית מפני יהוה צבאות ‬<br /> ‫ ועתה אנחנו מאשרים זדים גם נבנו עשי רשעה גם בחנו אלהים וימלטו ‬<br /> ‫ אז נדברו יראי יהוה איש את רעהו ויקשב יהוה וישמע ויכתב ספר זכרון לפניו ליראי יהוה ולחשבי שמו ‬<br /> ‫ והיו לי אמר יהוה צבאות ליום אשר אני עשה סגלה וחמלתי עליהם כאשר יחמל איש על בנו העבד אתו ‬<br /> ‫ ושבתם וראיתם בין צדיק לרשע בין עבד אלהים לאשר לא עבדו ‬<br /> ‫ כי הנה היום בא בער כתנור והיו כל זדים וכל עשה רשעה קש ולהט אתם היום הבא אמר יהוה צבאות אשר לא יעזב להם שרש וענף ‬<br /> ‫ וזרחה לכם יראי שמי שמש צדקה ומרפא בכנפיה ויצאתם ופשתם כעגלי מרבק ‬<br /> ‫ ועסותם רשעים כי יהיו אפר תחת כפות רגליכם ביום אשר אני עשה אמר יהוה צבאות ‬<br /> ‫ זכרו תורת משה עבדי אשר צויתי אותו בחרב על כל ישראל חקים ומשפטים ‬<br /> ‫ הנה אנכי שלח לכם את אליה הנביא לפני בוא יום יהוה הגדול והנורא ‬<br /> ‫ והשיב לב אבות על בנים ולב בנים על אבותם פן אבוא והכיתי את הארץ חרם ‬<br /> ‪xxxx‬<br /> ‪xxxx End of Malachi (3 chapters, 55 verses).</div>

Pig