https://sensusplenior.net/wiki/index.php?action=history&feed=atom&title=Leningrad%3ARu 2026-10-17T20:10:03Z Revision history for this page on the wiki MediaWiki 1.28.3 https://sensusplenior.net/wiki/index.php?title=Leningrad:Ru&diff=33937&oldid=prev 2022-04-23T17:26:22Z

<p>Created page with &quot;‪xxxx Unicode/XML Leningrad Codex [UXLC 1.4]‬ ‪xxxx Build: 26.5 - 1 April 2022 00:00‬ ‪xxxx Layout: Qere-only; Content: Consonants.‬ ‪xxxx‬ ‪x...&quot;</p> <p><b>New page</b></p><div>‪xxxx Unicode/XML Leningrad Codex [UXLC 1.4]‬<br /> ‪xxxx Build: 26.5 - 1 April 2022 00:00‬<br /> ‪xxxx Layout: Qere-only; Content: Consonants.‬<br /> ‪xxxx‬<br /> ‪xxxx Ruth (4 chapters, 85 verses).‬<br /> ‪xxxx‬<br /> ‪xxxx Chapter 1 (22 verses)‬<br /> ‪xxxx‬<br /> ‫ ויהי בימי שפט השפטים ויהי רעב בארץ וילך איש מבית לחם יהודה לגור בשדי מואב הוא ואשתו ושני בניו ‬<br /> ‫ ושם האיש אלימלך ושם אשתו נעמי ושם שני בניו מחלון וכליון אפרתים מבית לחם יהודה ויבאו שדי מואב ויהיו שם ‬<br /> ‫ וימת אלימלך איש נעמי ותשאר היא ושני בניה ‬<br /> ‫ וישאו להם נשים מאביות שם האחת ערפה ושם השנית רות וישבו שם כעשר שנים ‬<br /> ‫ וימותו גם שניהם מחלון וכליון ותשאר האשה משני ילדיה ומאישה ‬<br /> ‫ ותקם היא וכלתיה ותשב משדי מואב כי שמעה בשדה מואב כי פקד יהוה את עמו לתת להם לחם ‬<br /> ‫ ותצא מן המקום אשר היתה שמה ושתי כלתיה עמה ותלכנה בדרך לשוב אל ארץ יהודה ‬<br /> ‫ ותאמר נעמי לשתי כלתיה לכנה שבנה אשה לבית אמה יעש יהוה עמכם חסד כאשר עשיתם עם המתים ועמדי ‬<br /> ‫ יתן יהוה לכם ומצאן מנוחה אשה בית אישה ותשק להן ותשאנה קולן ותבכינה ‬<br /> ‫ ותאמרנה לה כי אתך נשוב לעמך ‬<br /> ‫ ותאמר נעמי שבנה בנתי למה תלכנה עמי העוד לי בנים במעי והיו לכם לאנשים ‬<br /> ‫ שבנה בנתי לכן כי זקנתי מהיות לאיש כי אמרתי יש לי תקוה גם הייתי הלילה לאיש וגם ילדתי בנים ‬<br /> ‫ הלהן תשברנה עד אשר יגדלו הלהן תעגנה לבלתי היות לאיש אל בנתי כי מר לי מאד מכם כי יצאה בי יד יהוה ‬<br /> ‫ ותשנה קולן ותבכינה עוד ותשק ערפה לחמותה ורות דבקה בה ‬<br /> ‫ ותאמר הנה שבה יבמתך אל עמה ואל אלהיה שובי אחרי יבמתך ‬<br /> ‫ ותאמר רות אל תפגעי בי לעזבך לשוב מאחריך כי אל אשר תלכי אלך ובאשר תליני אלין עמך עמי ואלהיך אלהי ‬<br /> ‫ באשר תמותי אמות ושם אקבר כה יעשה יהוה לי וכה יסיף כי המות יפריד ביני ובינך ‬<br /> ‫ ותרא כי מתאמצת היא ללכת אתה ותחדל לדבר אליה ‬<br /> ‫ ותלכנה שתיהם עד באנה בית לחם ויהי כבאנה בית לחם ותהם כל העיר עליהן ותאמרנה הזאת נעמי ‬<br /> ‫ ותאמר אליהן אל תקראנה לי נעמי קראן לי מרא כי המר שדי לי מאד ‬<br /> ‫ אני מלאה הלכתי וריקם השיבני יהוה למה תקראנה לי נעמי ויהוה ענה בי ושדי הרע לי ‬<br /> ‫ ותשב נעמי ורות המואביה כלתה עמה השבה משדי מואב והמה באו בית לחם בתחלת קציר שערים ‬<br /> ‪xxxx‬<br /> ‪xxxx Chapter 2 (23 verses)‬<br /> ‪xxxx‬<br /> ‫ ולנעמי מודע לאישה איש גבור חיל ממשפחת אלימלך ושמו בעז ‬<br /> ‫ ותאמר רות המואביה אל נעמי אלכה נא השדה ואלקטה בשבלים אחר אשר אמצא חן בעיניו ותאמר לה לכי בתי ‬<br /> ‫ ותלך ותבוא ותלקט בשדה אחרי הקצרים ויקר מקרה חלקת השדה לבעז אשר ממשפחת אלימלך ‬<br /> ‫ והנה בעז בא מבית לחם ויאמר לקוצרים יהוה עמכם ויאמרו לו יברכך יהוה ‬<br /> ‫ ויאמר בעז לנערו הנצב על הקוצרים למי הנערה הזאת ‬<br /> ‫ ויען הנער הנצב על הקוצרים ויאמר נערה מואביה היא השבה עם נעמי משדה מואב ‬<br /> ‫ ותאמר אלקטה נא ואספתי בעמרים אחרי הקוצרים ותבוא ותעמוד מאז הבקר ועד עתה זה שבתה הבית מעט ‬<br /> ‫ ויאמר בעז אל רות הלוא שמעת בתי אל תלכי ללקט בשדה אחר וגם לא תעבורי מזה וכה תדבקין עם נערתי ‬<br /> ‫ עיניך בשדה אשר יקצרון והלכת אחריהן הלוא צויתי את הנערים לבלתי נגעך וצמת והלכת אל הכלים ושתית מאשר ישאבון הנערים ‬<br /> ‫ ותפל על פניה ותשתחו ארצה ותאמר אליו מדוע מצאתי חן בעיניך להכירני ואנכי נכריה ‬<br /> ‫ ויען בעז ויאמר לה הגד הגד לי כל אשר עשית את חמותך אחרי מות אישך ותעזבי אביך ואמך וארץ מולדתך ותלכי אל עם אשר לא ידעת תמול שלשום ‬<br /> ‫ ישלם יהוה פעלך ותהי משכרתך שלמה מעם יהוה אלהי ישראל אשר באת לחסות תחת כנפיו ‬<br /> ‫ ותאמר אמצא חן בעיניך אדני כי נחמתני וכי דברת על לב שפחתך ואנכי לא אהיה כאחת שפחתיך ‬<br /> ‫ ויאמר לה בעז לעת האכל גשי הלם ואכלת מן הלחם וטבלת פתך בחמץ ותשב מצד הקוצרים ויצבט לה קלי ותאכל ותשבע ותתר ‬<br /> ‫ ותקם ללקט ויצו בעז את נעריו לאמר גם בין העמרים תלקט ולא תכלימוה ‬<br /> ‫ וגם של תשלו לה מן הצבתים ועזבתם ולקטה ולא תגערו בה ‬<br /> ‫ ותלקט בשדה עד הערב ותחבט את אשר לקטה ויהי כאיפה שערים ‬<br /> ‫ ותשא ותבוא העיר ותרא חמותה את אשר לקטה ותוצא ותתן לה את אשר הותרה משבעה ‬<br /> ‫ ותאמר לה חמותה איפה לקטת היום ואנה עשית יהי מכירך ברוך ותגד לחמותה את אשר עשתה עמו ותאמר שם האיש אשר עשיתי עמו היום בעז ‬<br /> ‫ ותאמר נעמי לכלתה ברוך הוא ליהוה אשר לא עזב חסדו את החיים ואת המתים ותאמר לה נעמי קרוב לנו האיש מגאלנו הוא ‬<br /> ‫ ותאמר רות המואביה גם כי אמר אלי עם הנערים אשר לי תדבקין עד אם כלו את כל הקציר אשר לי ‬<br /> ‫ ותאמר נעמי אל רות כלתה טוב בתי כי תצאי עם נערותיו ולא יפגעו בך בשדה אחר ‬<br /> ‫ ותדבק בנערות בעז ללקט עד כלות קציר השערים וקציר החטים ותשב את חמותה ‬<br /> ‪xxxx‬<br /> ‪xxxx Chapter 3 (18 verses)‬<br /> ‪xxxx‬<br /> ‫ ותאמר לה נעמי חמותה בתי הלא אבקש לך מנוח אשר ייטב לך ‬<br /> ‫ ועתה הלא בעז מדעתנו אשר היית את נערותיו הנה הוא זרה את גרן השערים הלילה ‬<br /> ‫ ורחצת וסכת ושמת שמלתיך עליך וירדת הגרן אל תודעי לאיש עד כלתו לאכל ולשתות ‬<br /> ‫ ויהי בשכבו וידעת את המקום אשר ישכב שם ובאת וגלית מרגלתיו ושכבת והוא יגיד לך את אשר תעשין ‬<br /> ‫ ותאמר אליה כל אשר תאמרי אלי אעשה ‬<br /> ‫ ותרד הגרן ותעש ככל אשר צותה חמותה ‬<br /> ‫ ויאכל בעז וישת וייטב לבו ויבא לשכב בקצה הערמה ותבא בלט ותגל מרגלתיו ותשכב ‬<br /> ‫ ויהי בחצי הלילה ויחרד האיש וילפת והנה אשה שכבת מרגלתיו ‬<br /> ‫ ויאמר מי את ותאמר אנכי רות אמתך ופרשת כנפך על אמתך כי גאל אתה ‬<br /> ‫ ויאמר ברוכה את ליהוה בתי היטבת חסדך האחרון מן הראשון לבלתי לכת אחרי הבחורים אם דל ואם עשיר ‬<br /> ‫ ועתה בתי אל תיראי כל אשר תאמרי אעשה לך כי יודע כל שער עמי כי אשת חיל את ‬<br /> ‫ ועתה כי אמנם כי גאל אנכי וגם יש גאל קרוב ממני ‬<br /> ‫ ליני הלילה והיה בבקר אם יגאלך טוב יגאל ואם לא יחפץ לגאלך וגאלתיך אנכי חי יהוה שכבי עד הבקר ‬<br /> ‫ ותשכב מרגלותיו עד הבקר ותקם בטרם יכיר איש את רעהו ויאמר אל יודע כי באה האשה הגרן ‬<br /> ‫ ויאמר הבי המטפחת אשר עליך ואחזי בה ותאחז בה וימד שש שערים וישת עליה ויבא העיר ‬<br /> ‫ ותבוא אל חמותה ותאמר מי את בתי ותגד לה את כל אשר עשה לה האיש ‬<br /> ‫ ותאמר שש השערים האלה נתן לי כי אמר אלי אל תבואי ריקם אל חמותך ‬<br /> ‫ ותאמר שבי בתי עד אשר תדעין איך יפל דבר כי לא ישקט האיש כי אם כלה הדבר היום ‬<br /> ‪xxxx‬<br /> ‪xxxx Chapter 4 (22 verses)‬<br /> ‪xxxx‬<br /> ‫ ובעז עלה השער וישב שם והנה הגאל עבר אשר דבר בעז ויאמר סורה שבה פה פלני אלמני ויסר וישב ‬<br /> ‫ ויקח עשרה אנשים מזקני העיר ויאמר שבו פה וישבו ‬<br /> ‫ ויאמר לגאל חלקת השדה אשר לאחינו לאלימלך מכרה נעמי השבה משדה מואב ‬<br /> ‫ ואני אמרתי אגלה אזנך לאמר קנה נגד הישבים ונגד זקני עמי אם תגאל גאל ואם לא יגאל הגידה לי ואדעה כי אין זולתך לגאול ואנכי אחריך ויאמר אנכי אגאל ‬<br /> ‫ ויאמר בעז ביום קנותך השדה מיד נעמי ומאת רות המואביה אשת המת קניתה להקים שם המת על נחלתו ‬<br /> ‫ ויאמר הגאל לא אוכל לגאל לי פן אשחית את נחלתי גאל לך אתה את גאלתי כי לא אוכל לגאל ‬<br /> ‫ וזאת לפנים בישראל על הגאולה ועל התמורה לקים כל דבר שלף איש נעלו ונתן לרעהו וזאת התעודה בישראל ‬<br /> ‫ ויאמר הגאל לבעז קנה לך וישלף נעלו ‬<br /> ‫ ויאמר בעז לזקנים וכל העם עדים אתם היום כי קניתי את כל אשר לאלימלך ואת כל אשר לכליון ומחלון מיד נעמי ‬<br /> ‫ וגם את רות המאביה אשת מחלון קניתי לי לאשה להקים שם המת על נחלתו ולא יכרת שם המת מעם אחיו ומשער מקומו עדים אתם היום ‬<br /> ‫ ויאמרו כל העם אשר בשער והזקנים עדים יתן יהוה את האשה הבאה אל ביתך כרחל וכלאה אשר בנו שתיהם את בית ישראל ועשה חיל באפרתה וקרא שם בבית לחם ‬<br /> ‫ ויהי ביתך כבית פרץ אשר ילדה תמר ליהודה מן הזרע אשר יתן יהוה לך מן הנערה הזאת ‬<br /> ‫ ויקח בעז את רות ותהי לו לאשה ויבא אליה ויתן יהוה לה הריון ותלד בן ‬<br /> ‫ ותאמרנה הנשים אל נעמי ברוך יהוה אשר לא השבית לך גאל היום ויקרא שמו בישראל ‬<br /> ‫ והיה לך למשיב נפש ולכלכל את שיבתך כי כלתך אשר אהבתך ילדתו אשר היא טובה לך משבעה בנים ‬<br /> ‫ ותקח נעמי את הילד ותשתהו בחיקה ותהי לו לאמנת ‬<br /> ‫ ותקראנה לו השכנות שם לאמר ילד בן לנעמי ותקראנה שמו עובד הוא אבי ישי אבי דוד ‬<br /> ‫ ואלה תולדות פרץ פרץ הוליד את חצרון ‬<br /> ‫ וחצרון הוליד את רם ורם הוליד את עמינדב ‬<br /> ‫ ועמינדב הוליד את נחשון ונחשון הוליד את שלמה ‬<br /> ‫ ושלמון הוליד את בעז ובעז הוליד את עובד ‬<br /> ‫ ועבד הוליד את ישי וישי הוליד את דוד ‬<br /> ‪xxxx‬<br /> ‪xxxx End of Ruth (4 chapters, 85 verses).</div>

Pig